Ангирын дуу гангарч

Сул аялгуу исгэрнэ.

Аадрын үүлс нүүгэлтэж

Сувдан зэрэглээ шилэрнэ.

         ***    ***    ***

Тэргэл сарны мөнгөн асгарт

Бодлоо нисгэе

Тэрлэг нимгэн орчлонгийн униарт

Гунигаа нимгэлье.

        ***    ***    ***

Бодол бодолдоо орооцолдон

Хүмүүний явдал тэгширнэ

Болор салхи цуучиж

Хүслийн чагатга алдуурна.

Монгол наадмын торгон дэвжээ

Цол дуудна

Монхор хөх өвгөн

Гал гуайн нэр дуурсана.

*********

Агсаруу шүлэгчийн зүрх

Найргийн гал өрдөнө.

Алтан солир шатаж

Тэнэг бодол урвана.

*******

Ижилгүй ганцхан шарга

Хэрлэн цалигтал үүрсэнэ.

Ижий минь үг тэгэхэд 

Энгэр цориглотол бодогдоно.

*******

Өвөөгийн бодол

Урьд шөнийн үлгэр шигээ урт

Үрээ морин

Уяан дээр үүрсэх нь үүрээр эрт
 
         ***   ***   ***

Дээдсийн алтан сургаал

Амьд судар мэт байдаг аа

Дэвэрсэн сэтгэлд

Амьдралын дарс нэрэлцдэг ээ.

       ***   ***    ***

Үдэш үдшийн саран

Тэнгэртээ мэлмэс

Үүл үүлний нүүдэл

Тэнэмэл дээ нулимс

       ***   ***   ***

Долоон сарын цэцэгс согтуурхана

Дорны цагаан саран солонгортоно

Өвгөд хөгшид хуучлан тухалсхийнэ

Үйлийн үргүй сэтгэл тунгалагшина.

        ***    ***   ***

Эрхэтий хайрхан цэнхэртэн

Дуниартаж гэрэлтэнэ

Ижий минь үг цээжин дотуур

Дуншиж гэрэлтэнэ.

       ***    ***   ***

Тостой гэгээ залиглаж

Хаврын үдэш тайтгарна

Тогоруудын дуунд нялхарч

Яргуй цэцэгс зүүдэлж сэрнэ         

        ***   ***   ***

Хойд ууланд гэрэлтэх

Алтан зул бөмбөлзөхүй

Холын холоо явчихсан

Ажаа ижий хоёр

Минь бодогдоно.

        ***    ***   ***

Санахын хармаар анхилах

Сүүний үнэртэй ижий минь

Салхи шуурганд элсэн

Чулууны үнэртэй бурхан болой.

        ***    ***   ***

Энгэр цориглох

Цээжний зул манан татарна

Ижий бидэн хоёр

Цэцэгсийн инээд залиглан тайтгарна.