Орь дуу хадааж

Ижий минь надаар гоёсон шиг

Орчлонд би хүмүүн заяаг олохдоо

Өөр өөрийгөө зөндөөн их гоёсоон

Сайхан ижийнхээ  хэвлийд

Булбарайхан биеэ нууж гоёсон

Сар нарны тэнгэр

Бурхадаар нь шүтэж гоёсон

Ижий дагиныхаа

Суут ухаанаар нь гоёсон

Их л намуухан Хэрлэнгийнхээ

Сувдан усаар нь гоёсон

Нэхий өлгийдөө

Нэг нас бүтэн биеэ гоёсон

Нэрэн Жагай ламын хайрласан

Нэрээр нь дуудуулж өөрийгөө гоёсон

Өвгөд хөгшидийнхээ

Үлгэр домгоор нь гоёсон

Өрөөлийг аргадан

Өр зүрхний хайраар нь гоёсон

Гэмшиж баясахын жаргалд

Амраг ханиа гоёсон

Гэрэлт орчлонд

Алаг нүдэн үрсээ гоёсон

Хайрхан уул "Эрхэт"-ийгээ

Дуурайж өөрийгөө гоёсон

Халхад цуутай Боржигоныхоо

Дуугаар нь гоёсон

Сүүл хөхөн ямбалж

Цайлган сэтгэлээ жаргааж гоёсон ч

Сүүдрээ огшоож дэрлэхийн цагт л

Богдынхоо голын чулуу чамайг нэрээрээ гоёноо . .

                                                          2003,05,16