Сүү асгарсан цэцэгсийн

Бал шүүсэнд бахардаж

Сүмбэ шаргал өвсөн

Нарны урсгалаар гэлдэрнэ.

Сүрэг шувуудын дуунд

Ижий тэнгэр уярч

Сүүлчийн дусал нулимсаа

Эрхэтийн ууланд минь өргөнө.

                                                2003.08.05

Сар хаяанд үзэгдэх

Салхи хатавчаар улингатах

Бүүдгэр намрын хөх үдэш

Бүгээн гэгээн гунигтай

Өндөр намрын шөнөөр

Өнчин туулай гүйдэг

Мөнгөн зөрөг

Мөрөөдлийн салхитай

                                   2003.08.19       

Зүрхэнд хуурдах

Гүйлс цэцэглэм хавраар

Зүүдэн холоос

Гүйгээд ирдэг хүлгийн тоостой

Малахын тал

Ажнайн хөлстэй  сувдарч мэлмэрнэ

Марал мичид

Оддын сураг сонсож нялхарна

                                                         2003.07.11

Сар хээлэн урсдаг

Ил булаг

Салхи хөглөн уясдаг

Их булаг

Одод хотлон жаргадаг

“тал” булаг

Орчлонд миний л санагалздаг

Бүтэн булаг

                                         1998.07.15      

Хорвоо ертөнц

Бөөрөнхийлдөө л бөөрөнхий

Хоёр биш

Ганц амьдрал минь амгалан

Нас цаг

Үүлэн сүүдэр шиг ахархан

Надад ахадсан зовлон

Үлэмж арвиндаа л жаргалан

                                          1999.05.01