Нар аргамжсан уулын сүүдрээс
Алс зайдуу
Насны гал учрахын заяа
Амсахын золгүй
Үүрээ зассан шувуудыг
Саглагар саглагар иөчиртөө тээсэн
Өндөг амилах халуун өлгий
Салхи шуурганд элэх моддын үлгэр
Гурван хайлаас
Талын судаанд зүүрмэглэнэ
Гундахгүй гандахгүйн дуулийг
Тас шувуудын далавчин доор хүүрнэнэ
Шувуудын жиргээг өлгийдөж
Далавчны нь сүүдэрт сэрүүцсэн
Өндөг өхөөрдөж ангаахайн үүр тээсэн
Өвгөн хайлаас гурван хайлаас
1995.04.21
...Таана шимсэн униар
Салхинд сөгдөөд адгуу
Талст мөнгөн одод шиг
Худаг руу цувсан адуу
Чандмалж буусан гурван гэр
Харахад нэг л содон ч
Чамдаа хэлэх гээд удсан
Хайрын үг минь годон
Хөллөөд боссон утаа
Тэнгэр зээглээд аядуу
Дөлөөд холсон униар
Тэмээдийн бөхөнд согтуу
Тэнгэр тэмээ хоёрын
Чимээ анирлах агшин
Тэнд миний хүслэн
Чи минь байгаа гэхээс
Бадамлах цэцгийн үнэрт
Агдаж буусан эрвээхэй шиг
Баясал аясалын гэгээ
Аяар аяархан намирна
1995.04 .14
...Цэнхэр цэнхэр тэнгэр
Ариусгалын гал шиг цэмцгэрээ
Чиний минь суугаа нутаг
Агийн тал шиг цэлгэрээ
Цэцэгт хангайн тэнгэр
Зөөлөн борооны дуслаа
Чи минь харин наддаа
Зүрхэнд хоргодох агираа
Сар тунарах үдшийн тэнгэр
Үелээ мяндсан оддын зэрэглээ
Сайхан төрсөн чи минь
Үзэсгэлэн гоо хонгор зулаа
Боржигон нутгийн тэнгэр
Найр наадмын түрлэг гурван дугараа
Бодол сүлсэн чиний минь мишээл
Намайгаа хөглөсөн шүлгийн минь дуун
1995.04.20
...Галтай зуны
Жаварт хэрсүүжиж
Хөлдүү өвлийн
Харзанд тонгочихсон
Наргил намрын
Буданд халамцаж
Яргуйт хаврын
Аашинд нь агсрахсан
Хэрсүү явсны минь тэмдэг
Сураар ороолгосон совин шиг
Хэдэр араншинтай
Сул задгай шүлэг минь
Дэлхий орчлонг ороолгох
Салхи шуурга мэт
Дээлтэй зүрхнээс асах
Миний араншин
1995 он
...Наран тогоруутай тэнгэр бүүдийгээд
Найр наадам огтолж хэнзлээд
Налайсан шаргал өдрүүд алгаа
Намар болоо юм байлгүй
Хээр талын
Буйдхан нуурын хөл татарчээ
Хэдэн бор галуу нь
Буцаа юм байлгүй
Насны гэгээн хүслэн гэгэлзээд
Наргил шаргил дэнж эл хульхан болж
Нар айраг хоёрын сураг бүр алдуурчээ
Намар оройсоо юм байлгүй
Бичлэг тандагч