Эхээс төрөхийн би босоо

Элсэн дээрх мөр минь ч босоо

Эрт галавын Монгол шигээ босоо

Эзэн Чингэсийнхээ омог шигээ босоо

                                Холын бодол минь ч босоо

                                Хонин бор толгод шигээ босоо

                                Бодлоо жаргааж туйлан

                                Босоо заяатай Монгол....оо би

Сарны мөнгөн асгар шиг босоо

Салхи шуурганд элсэн чулуудын

                                                Үлгэр мэт босоо

Сайр шандын болор усан мэт босоо

Санаж  мөрөөсөхийн жаргалаар ижийгээ гоёсон босоо

                      ...

Сар жилүүд

         Чанад хол руу урсаж одно

Сайхан ижийдээ

         Сэтгэл уясаж оройтоно

Чимээ амирлангуй

         Амгалан бороо

Цэнхэр зүүдэнд

         Алтарч урсана

Ижий минь

        Ааш ялдамхан

Идэр залуу хэвээрээ

         Зүрхэнд гэрэлтэнэ.

                                                   1999.12.20

Дэрэнгээ л гэх эрх цайлган шанд

Дэрс нугын зүрх цагаан хонд

Халтар говийн тогосхон салхинд

Халирч элрээгүй торгон угалз

Халуун гангын бор тэшээнд

Халгилж цалгилсан босоо уянга

Дуу эсгэж гэмээнэ янагшихын жаргалтай

Дурлал ичээж гэмшихийн нулимстай

Дэлхийн их од

                        Тэнгэр уулын атаархал

“Дэрэн”-ийн хөх салхи

Тэс хөндлөн говийн босоо араншин

 

1999.11.30

...

Тэнгэрийн мэлмийд үлдэх

Даль жигүүртний өргөл

Тэрлэг гандааж жаргах

Далдуу цайлган сэтгэл

Навчис цэцэгсийн амин

Онгод сүлсэн найраг

Нар хурын шимэн

Оройтсон боржигоны намар

Буцах шувуудын ганганаанд

Чимээ аядан дүнсийнэ

Будант уулсын зулайгаас

Чийглэг салхин амсана

Оройтсон боржигоны намар

Тогоруудын цуваанд уймарна

Олойртсон тэнгэрийн хаяа

Тогоотой сүүнд үймэрнэ

Хултай айрганд алтрах

Үүлэн чөлөөний наран

Хуурын татлаганд эгшиглэх

Үзэсгэлэнт боржигоны намар

Үелээ мянган толгод

Агийн сөлөнд нялхарна

Үйзэн цэнхэр талын

Алтлаг толионд жаргана.

 

                    ...

Нэгэн  цагт би

Гоёхон шүлэг бичдэг байж

Говьд ургасан

Гоёоны тухай дуулдаг байж

Одоо ....

Огт өөр болж

Галибанга шувуу зууж ниссэн

Ганц өвсний төлөө

Гэнэ гэнэхэн сэтгэлийн дуундаа

Гивлүүр мододын үлгэр зохиодог болж....

                                                                 

                                                                  2004.02.02

...